Ég er stolt af því að vera til ráðgjafar þingsályktunartillögu til að tryggja alþjóðlega vernd fyrir rannsóknarblaðamennsku. Í huga mér inniber þessi ályktun sterk skilaboð og hvatningu til eflingar heilinda og gagnsæis hjá ríkisstjórnum víðsvegar um heim, þ.á.m. á Íslandi. Í starfi mínu við rannsóknir á spillingu hef ég orðið vitni af því hve mikilvægt það er að hafa öflugt regluverk til tryggja aðgengi almennings að upplýsingum. Ísland getur með nýstárlegri sýn á samhengi tilverunnar og vegna tilhneigingar til að fara sínar eigin leiðir orðið hinn fullkomni staður til að hrinda af stað verkefni af þessu tagi sem yrði til þess að efla gagnsæi og réttlæti á heimsvísu.
Ísland er á einstökum tímamótum. Á slíkum tímum er mikilvægt að finna sameiginlega framtíðarsýn og stefnu sem gæti þjappað þjóð og þingi saman.
Lögð verður fram tillaga til þingsályktunar 16. febrúar 2010 um að Ísland skapi sér afgerandi lagalega sérstöðu varðandi verndun tjáningar- og upplýsingafrelsis. Þingsályktunartillagan hefur fengið frábærar undirtektir innan þings sem utan.
Markmiðið með þessari stefnu er að fela ríkisstjórninni að leita leiða til að styrkja tjáningarfrelsi, málfrelsi, upplýsingamiðlun og útgáfufrelsi hérlendis auk þess sem vernd heimildarmanna og uppljóstrara verði tryggð. Til þess að það geti orðið að veruleika þarf að undirbúa nauðsynlegar lagabreytingar eða nýja löggjöf, sem byggð væri á bestu mögulegu löggjöf annarra þjóða sem við gjarnan berum okkur saman við til að skapa Íslandi sérstöðu á sviði tjáningar- og upplýsingafrelsis. Þá finnst okkur vera kominn tími á að komið verði á fót fyrstu alþjóðaverðlaununum sem kennd yrðu við Ísland: Íslensku tjáningarfrelsisverðlaununum.
Við lítum svo á að þessi tillaga sé ekki eign neins flokks eða hreyfingar innan þingsins, heldur sameiginlegt verkefni allra þingmanna til að finna sáttatón og flöt á samvinnu til að hjálpa okkur upp úr þeim erfiðu tímum sem framundan eru.
Nú þegar hefur verið haft samband við og tillagan kynnt fyrir fjöldamörgum aðilum sem hagsmuna eiga að gæta. Eva Joly hefur lýst yfir stuðningi við ályktunina enda gerir hún sér vel grein fyrir hve mikilvægt þess að mörkuð verði heildræn stefna og löggjöf sem tryggir tjáningarfrelsi. Okkur til mikillar ánægju hefur ályktunni alls staðar verið tekið mjög vel.
Mikill áhugi erlendra blaðamanna er á fyrirhugaðri lagasetningu enda á sú stétt undir högg að sækja vegna þess að frelsi þeirra til að flytja fréttir er í sívaxandi mæli skert. Í þeirra huga gæti Ísland orðið að andhverfu skattaskjóla, þ.e.a.s. blaðamennskuskjól.
Tillögurnar í greinargerðinni eru til þess fallnar að umbreyta reglugerðinni á þann hátt að hér verði framsækið umhverfi fyrir skráningu og starfsemi alþjóðlegra fjölmiðla og útgáfufélaga, sprotafyrirtækja, mannréttindasamtök og gagnaversfyrirtæki. Slíkar breytingar mundu treysta stoðir lýðræðis, verða hvati til nauðsynlegra umbóta hérlendis og auka gagnsæi og aðhald. Stefnumörkunin gæti gefið þjóðinni aukið vægi á erlendum vettvangi og orðið lyftistöng í atvinnu- og efnahagsmálum.