April 12, 2016 | Posted in:Uncategorized

IMMI, alþjóðleg stofnun um upplýsinga- og tjáningarfrelsi, leggst eindregið gegn heftingu tjáningarfrelsis starfsmanna RÚV sem nýjar siðareglur RÚV kveða á um.
Í nýju siðareglunum segir m.a.:

,,Starfsfólk, sem sinnir umfjöllun um fréttir, fréttatengt efni og dagskrárgerð tekur ekki opinberlega afstöðu í umræðu um pólitísk málefni eða umdeild mál í þjóðfélagsumræðunni, þ.á.m. á samfélagsmiðlum.”

Hér er stjórnarskrárvarinn réttur til frjálsrar tjáningar virtur að vettugi en 73. gr. Stjórnarskrár Íslands er eftirfarandi:

Allir eru frjálsir skoðana sinna og sannfæringar.
Hver maður á rétt á að láta í ljós hugsanir sínar, en ábyrgjast verður hann þær fyrir dómi. Ritskoðun og aðrar sambærilegar tálmanir á tjáningarfrelsi má aldrei í lög leiða.
Tjáningarfrelsi má aðeins setja skorður með lögum í þágu allsherjarreglu eða öryggis ríkisins, til verndar heilsu eða siðgæði manna eða vegna réttinda eða mannorðs annarra, enda teljist þær nauðsynlegar og samrýmist lýðræðishefðum

Það er grafalvarlegt að ætla að hefta skoðana- og tjáningarfrelsi starfsmanna RÚV. Hér er um aðför að persónufrelsi að ræða þar sem einstaklingum er gert að hafa skoðanir sínar í hljóði til þess að mega sinna störfum sínum fyrir ríkisfjölmiðil. Vitanlega á að krefjast fagmennsku í fréttaflutningi og hlutleysis er gætt með því að ólík sjónarmið fái að heyrast. En að hefta lögbundin borgaraleg réttindi einstaklinga með þessum hætti og krefjast þess að einstaklingar sitji á skoðunum sínum og sjálfsritskoði skrif sín og samskipti er í besta falli óboðlegt, í versta falli þöggun.

IMMI stofnunin hvetur til endurskoðunar þessara siðareglna undir eins til að stöðva sem fyrst kælingaráhrif þessara reglna á tjáningarfrelsi.